Nasa kalagitnaan na tayo ng buwan ng Agosto ngunit kailangang ko pa rin gunitain ang Agosto bilang Buwan ng Wika. Hayaan niyo akong gamitin ang ating salitang bernakyular na Filipino. Tandaan Filipino at hindi Tagalog. Ano ba ang pinagkaiba? Sa ating panahon ngayon, ang salitang Filipino ay may mga hiniram na salita mula sa salitang Ingles. Isang halimbawa ay ang salitang variable. Alam niyo ba na mahirap mag-isip na katumabas na Tagalog ng salitang ito? Pero sa Filipino ang salitang ito ay may katumbas na salitang "baryabol". Katulad ulit ng salitang journal. Sa Tagalog ang salitang ito ay may katumbas na "talaarawan" at pagdating naman sa Filipino ito ay may katumbas na "dyornal". Minsan pangit at nakakatawa pakinggan at basahin ang mga salitang ito. Kung ano ating maririnig na tunog ay ganoon din ang gagawing katumbas na tunog sa Filipino. Pero kung tutuusin ay mas maayos pa ito sa mga salitang text o yung salitang pinaikli para mapagkasya sa isang text.

Ganon pa man, kailangan pa rin nating aralin ang salitang Ingles dahil ito ang ginagamit bilang salitang pangkalahatan. Ngunit hindi pa rin natin dapat kalimutan na mahalin ang ating sariling wika. Hindi tayo magiging Pilipino kung wala ang ating sariling wika. Tandaan ninyo ang sinabi ng ating dakilang bayani na si Doktor Jose Rizal; "Ang hindi magmahal sa sariling wika, daig pa ang hayop at malansang isda".